Երևանի «Հերացի» համալսարանական հիվանդանոցը դեկտեմբերի 31-ից մինչև հունվարի 7-ն ընկած ժամանակահատվածում գրանցել է 55 պացիենտ, որոնք տարբեր աստիճանի վնասվածքներ են ստացել սառույցի վրա ընկնելու հետևանքով։ Այս տվյալը հայտնում եմ՝ հիվանդանոցի ընդունարանի և անհետաձգելի բուժօգնության բաժնի ղեկավար Գայանե Ստեփանյանի հետ զրույցից։
Հիվանդանոցի տվյալներով՝ պացիենտների մեծամասնությունը (45-ը) ստացել է ամբուլատոր բուժօգնություն, իսկ 10-ը հոսպիտալացվել են և ենթարկվել վիրահատական միջամտության։
Մեզ դիմածների մեծ մասը մեծահասակներ են եղել։ 0-18 տարիքային խմբից 8 պացիենտի դեպքում վնասվածքները լրացուցիչ բուժման կարիք չեն ունեցել, իսկ 18 տարեկանից բարձր 47 պացիենտի դեպքում արձանագրվել են ավելի բարդ վնասվածքներ։
Ամբուլատոր բուժում ստացածների մեծամասնության դեպքում խոսքը սալջարդերի և վերին վերջույթների վնասվածքների մասին է եղել, որոնց դեպքում կատարվել են գիպսային անշարժացումներ։
Հոսպիտալացված 10 պացիենտներից յուրաքանչյուրը ենթարկվել է վիրահատական միջամտության։ Դրանց թվում են եղել կոտրվածքներ, այդ թվում՝ բարդ դեպքեր, ինչպիսիք են կոնքի վնասվածքը և ազդոսկրի կոտրվածքը։ Վիրահատությունից հետո բոլոր պացիենտները տեղափոխվել են արդեն ամբուլատոր հսկողության պոլիկլինիկաներ։
Չնայած Երևանի «Շտապօգնության» ՓԲԸ-ն տոնական օրերին ընդհանուր առմամբ զանգերի քանակի նվազում է գրանցել՝ համեմատած նախորդ տարիների հետ, «Հերացի» համալսարանական հիվանդանոցը սառույցի վրա ընկնելու հետևանքով վնասվածքներ ստացած բուժառուների թվով գրեթե կրկնակի աճ է գրանցել։
Այս իրավիճակի կապակցությամբ հորդորում եմ քաղաքացիներին զգույշ լինել ճանապարհներում, հագնել չսահող կոշիկներ և, հնարավորության դեպքում, խուսափել սառույցով պատված հատվածներից։
